Nxënësit e shkollës 9-vjeçare "Ibrahim Tema" në fshatin Kurdari të Klosit ngrohjen ua kanë besuar reflektorëve të cilët ua kanë sjellë prindërit, pasi kaldaja e shkollës nuk funksionon. Edhe ato që dukej sikur punonin nuk kishin as ngrohjen minimale, ndërkohë që shkolla " noton" nga lagështia dhe xhamat e thyer. Përgjegjësi i zyrës arsimore në Bashkinë Klos i dehur në orar të punës, nuk shpjegon gazetarët për situatën e shkollës por i shan dhe kërcënon. Në Fiks Fare u ankuan prindër të cilët fëmijët e tyre zhvillojnë orët mësimore në shkollën " Ibrahim Tema" në fshatin Kurdari të Klosit. Ankesa lidhet me kaldajat e kësaj shkolle nuk funksionojnë ose edhe ato pak që janë në punë kanë një ngrohje minimale. Dhe për këtë arsye ata vetë si prindër janë detyruar që në shkollë të çojnë reflektor që fëmijët mos të sëmuren. Ata gjithashtu ngritën shqetësimin edhe të kushteve të tjera të shkollës si lagështia në mure dhe xhamat e thyer. Gazetarët e Fiksit panë nga afër shkollën dhe filmuan muret e klasave që ishin të gjitha më lagështi, xhamat e thyer dhe të plasaritur në këtë shkollë dhe kaldajat jashtë funksionit. Në disa klasa ngrohja bëhej me reflektorë të cilët i kishin siguruar prindërit e nxënësve.