Një pensionist 74-vjeçar nga Zall-Bastari i Tiranës iu drejtua emisionit “Fiks Fare” për një problem që e shoqëronte prej vitesh. Sahati i ujit të pijshëm për banesën e tij ishte vendosur rreth 500 metra larg shtëpisë, në mes të pyllit, jashtë pronës së tij dhe në një zonë të pasigurt. Për shkak të largësisë dhe mungesës së kontrollit, matësi ishte dëmtuar disa herë ndër vite, duke e detyruar qytetarin të paguante vazhdimisht për zëvendësimin e tij. Madje, pas një kontrolli të Task Forcës së UKT-së, ai u gjobit edhe me 10 mijë lekë të rinj për dëmtimin e matësit. Pavarësisht kërkesave të vazhdueshme për zhvendosjen e sahatit pranë banesës, pensionisti nuk mori zgjidhje. Pas interesimit të emisionit “Fiks Fare”, UKT ndërhyri dhe realizoi zhvendosjen e matësit pranë shtëpisë së qytetarit, duke i dhënë fund një problemi që zgjati për vite.