Mediat kurdo-siriane të rajonit Rojava në Siri raportojnë për një vizitë të përfaqësuesve të Ministrisë së Brendshme shqiptare, të cilët janë duke u përpjekur për të ndërtuar një operacion riatdhesimi të fëmijëve dhe grave shqiptarë të mbetur në kampin Al-Hol. Top Channel duke iu referuar medias kurdo- siriane, që ka publikuar edhe fotot e takimit raporton se me autoritetet vendase janë takuar konsulli i Shqipërisë në Liban Marc Ghorayeb, së bashku me Gledis Nanon, drejtor i Drejtorisë së Antiterrorist në Policinë e Shtetit dhe Indrit Doda, po nga kjo drejtori. Pala shqiptare është pritur nga zyrtarët Abdul Karim Omar dhe Fenner Kaait pjesë e departamentit me marrëdhëniet me jashtë në qytetin Kamishli, provinca ku është edhe kampi Al Hol. Ky rajon qeveriset nga autoritete kurde. Sipas medias vendase krahas ndihmës të kërkuar nga delegacioni shqiptarë për të riatdhesuar fëmijët dhe gratë shqiptarë është folur edhe për bashkëpunimin në fushën e sigurisë dhe luftën ndaj terrorizmit. Autoritet e Rojavas në këtë takim kanë thënë se ato gra që janë vënë nën procedim penal nga autoritet kurdo-siriane duhet të presin mbarimin e hetimin e më pas mund të kthehen në një moment të dytë.