Si rezultat i reshjeve të shumta të shiut, që kanë rënë gjatë gjithë natës së kaluar, një pjesë e kryqëzimeve rrugore në qytetin e Durrësit kanë qenë të përmbytura këtë mëngjes. Situata ka shkaktuar trafik të rënduar dhe pamundësi për të lëvizur nga këmbësorët kryesisht në kryqëzimet dhe trotuaret e rrugëve në lagjet 12 dhe 17 të qytetit. Probleme kanë hasur veçanërisht nxënësit e shkollave në këtë pjesë të qytetit që janë përballur me pamundësinë për të kaluar në rrugët e trotuaret e përmbytura. Probleme janë shkaktuar dhe në bizneset përgjatë këtyre rrugëve, që pas reshjeve të shumta të shiut gjithmonë gjenden nën pushtetin e ujit. Kjo situatë e vazhdueshme krijon vështirësi të theksuara në qarkullimin e këmbësorëve dhe automjeteve, si dhe në kryerjen e aktiviteteve të përditshme.