Gjyqi i Apelit të GJKKO për kryetarin e Bashkisë së Tiranës, Erion Veliaj, duket se është kthyer në maratonë, pasi ende nuk ka një vendim. I pari i Bashkisë kërkon lirimin nga burgu për të vazhduar angazhimet e tij në krye të Tiranës, por dhe politike, të paktën deri në gjykimin në fazë përfundimtare. Prokurorët Altin Dumani dhe Olsi Dado duan që Veliaj të qëndrojë në qeli, pasi e konsiderojnë si rrezik për prishjen e provave. Ata paraqiten para trupit gjykues të martën prova të reja ndaj kryebashkiakut. Një tjetër proces i rëndësishëm ndaj një politikani me peshë u zhvillua në dyert e Gjykatës së Lartë. Ervin Salianji, ish-deputeti i Partisë Demokratike, mësoi rrëzimin e rekursit të bërë nga pala mbrojtëse duke e lënë në burg.Gjykata e Lartë para mospranimit të rekursit kishte refuzuar kërkesën e Salianjit për pezullimin e dënimit me 1 vit burg nga Apeli. Ish-deputeti i PD-së reagoi nga qelia duke deklaruar sërish se burgosja e tij është politike.