Kreu I qeverisë mbajti ditën e djeshme takimin me diasporën në Greqi, nën tingujt e himnit shqiptar dhe më pas të himnit të Bashkimit Europian. Shqiptarët i bënë një pritje madhështore kryeministrit Rama në sallën “Christmas Theater” në stadiumin 'Galatsi' në Athinë ku valëvitej flamuri kuq e zi. Gjatë takimit, ai bëri thirrje për heqjen e ligjit të luftës që lidhet kryesisht me pronat e shqiptarëve çamë. “Ai ligj i 10 nëntorit 1940 përcakton ç’bëhet me pronat dhe me shtetasit e vendeve në gjendje lufte dhe po atë ditë me dekret mbretëror ligjërohet që gjendja e luftës më Italinë dhe me Shqipërinë. Në vitin 1947 Greqia ratifikon traktatin e paqes me Italinë dhe gjendja e luftës mbaron. Ndërsa me Shqipërinë dekreti i gjendjes së luftës dhe për rrjedhojë pasojat e ligjit të luftës, mbeten në fuqi sot e gjithë ditën megjithëse në vitin 1998 të dyja shtetet kanë miratuar traktatin e miqësisë. Po si ka mundësi në mes dy shtetesh që kanë nënshkruar një traktat miqësie, që janë bashkë në NATO prej 15 vjetësh, të mos jetë shfuqizuar akoma gjendja e luftës bashkë me pasojat e një ligji lufte të 84 viteve më parë?” tha Rama. Gazetar: Kristo Kote