Bimët medicinale në lartësitë e maleve në Jug të Shqipërisë dhe ato në Veri të Greqisë ndajnë sipas ekspertëve të programit “Herbino” karakteristika të ngjashme që lidhen me habitatin natyror, cilësinë e tokës, lagështinë dhe mundësinë e rrallë për nxjerrjen e vajrave aromatikë. Programi i cili shtrihet në të dy vendet është duke eksperimentuar në dy parcela në Shqipëri dhe një në Greqi mundësinë e kultivimit të disa prej bimëve aromatike ndërsa po gjurmon në laborator cilësitë e veçanta të tyre në raport me të njëjtat bimë të kultivuara në zona të tjera. Kristina Anxhara: Programi do të ndërtojë një manual ndihmues për fermerët dhe grumbulluesit si dhe do të përcaktojë standartet për ruajtjen e bimëve medicinale. Ne po ndërtojmë një data basë të të gjithë fermerëve grumbullues në Shqipëri dhe Greqi dhe këtë data bazë do ta vemë në dispozicion të kompanive të mëdha grumbulluese në USA, Francë dhe Gjermani. Pala shqiptare ku janë të përfshira 2 bashki ajo e Dropullit dhe Gjirokastrës shpreson se rezultatet do të jenë me vlerë për fermerët dhe grumbulluesit shqiptarë. Programi do të sigurojë jo vetëm mundësi për tregje europianë por edhe një qasje të re sa i përket mbrojtjes së habitatit natyror të këtyre bimëve. Për arsye të shumta rajoni Jugor i Shqipërisë ka dëmtuar gjatë dekadës së fundit rreth 60% të habitatit të çajit të malit dhe sherebelës. Kostandina Çoparka pergjegjese e sektorit te kordinimit bashkia Gjirokastër “Kemi mbjellë një parcelë me katër lloje bimësh. Faza e rradhës do të jetë analizimi i tyre në laboratoret e universitetit të Janinës për të parë përfitimet që bima ka prej habitatit natyror ku kultivohet.” Studiuesit grekë të Universitetit të Janinës mendojnë se për nga vlerat që bimë si rigoni, çaji i malit, sherebela, barbarozi, marrin prej tipologjisë së tokës mund të klasifikohen si produkte me çmim të lartë në industrinë e grumbullimit të bimëve medicinale dhe aromatike.