Drejtuesit e kamionëve po përballen me vonesa të theksuara në përpunimin e kontejnerëve të mallrave në portin detar të Durrësit që ndikojnë në procesin zinxhir të lëvizjes së mallrave te porositësi i mallit dhe hedhja e tyre në treg për të mbuluar nevojat e konsumatorit. “Katastrofë, nga mungesa e stekave. Kjo na pengon, bllokon. Punohet vetëm me një stekë gjithsej dhe askush nuk pyet. “Puna në terminal është shumë e dobët dhe menaxhimi i punës. Vetëm tani kam mundur të mbaroj dhe të vazhdoj tranzit për Fier. Keqmenaxhim i situatës për shkaqe teknike, pasi mjetet i kanë me defekte dhe probleme. Kjo shkakton shumë probleme.” Transportuesit shprehen se me kalimin e shërbimit të ngarkim-shkarkimit nga koncensionari te shteti, vonesat janë shtuar, për shkak të mungesës së mjeteve funksionale të përpunimit në terminal, duke e vështirësuar situatën. “Shqetësimi ynë është se po vuajmë shumë me ngarkim-shkarkimin e konteinerëve. Edhe kur e kishte privati kishim probleme, po jo kaq shumë. Kërkojmë të zgjidhet pasi dhe puna jonë është zinxhir. Nuk kapim dot as doganën. Rriten kostot e kemi humbje pune. Ka personel, po nuk kanë mjete. Mjetet që janë aty duhet të riparohen. Ne duam të mbarojmë punë shpejt.” “Ne kemi pritur gjithnjë, po jo me orë të tejzgjatura. Ka probleme dhe në shkarkimin e anijeve, pasi mjetin e kanë larguar nga shkarkimi i anijes për të ngarkuar kamionët. Këtu ngarkohet jo vetëm për gjithë Shqipërinë, po dhe Kosovën e Maqedoninë.” Pas shqetësimit të ngritur, Autoriteti Portual Durrës bën me dije se sot në terminal janë në punë dy elektrovinça, 4 mjete të përpunimit të kontejnerëve dhe situata është drejt normalizimit, megjithatë transportuesit kërkojnë zgjidhjen e këtij problemi ë shumë mjete në për të realizuar në një kohë më të shpejtë procesin e ngarkim-shkarkimit të kontejnerëve në portin e Durrësit.