Ndeshja e tetorit 2014 në Beograd nuk ishte vetëm sportive, por reflektim I tensioneve dhe zhvillimeve ndërmjet dy kombeve. Pas 68 vitesh Shqipëria dhe Serbia luajtën përballë njëra tjetrës në atë që quhet si ndeshja më e famshme dhe më e tensionuar mes dy përfaqësuesve. Ndeshja u ndërpre në minutën e 41-të pas një incidenti me dronin që mbante flamurin “Shqipëria e Madhe”. Pas sherrit në fushë dhe sulmeve nga tifozët ndaj lojtarëve shqiptarë, ndeshja nuk rifilloi. UEFA fillimisht i dha fitoren Serbisë, por më pas Gjykata e Arbitrazhit Sportiv (CAS) e përmbysi vendimin dhe i dha fitoren 0–3 Shqipërisë. Për shkak të ngjarjes në tetor të 2014, një vit më pas ndeshja e radhës mes dy shteteve u luajt në “Elbasan Arena” në kushte sigurie maksimale. Shqipëria kishte nevojë për fitore për t’u kualifikuar në Euro 2016. Serbia, tashmë pa shanse për kualifikim, fitoi me dy gola në fundin e ndeshjes. Tifozëria shqiptare tregoi vetëpërmbajtje të admirueshme për të shmangur ndëshkime të UEFA-s. Në kontekst gjeopolitik, ndeshja e tetorit të vitit 2014 nxori në pah nivelin e papërgatitjes për bashkëjetesë sportive në Ballkan. Shqipëria do të përballet me Serbinë më 7 qershor, në kuadër të kualifikueseve për Kupën e Botës 2026, dhe UEFA ka zbuluar tashmë emrat e zyrtarëve të ndeshjes. Takimi do të drejtohet nga arbitri italian Davide Massa, i cili ka një precedent të vetëm me Kombëtaren shqiptare: një miqësore kundër Gjeorgjisë, zhvilluar më 16 nëntor 2015 në stadiumin “Qemal Stafa”, e cila përfundoi me rezultatin 2–2. Asistentët e tij do të jenë Filippo Meli dhe Ciro Carbone, ndërsa arbitër i katërt është caktuar Fabio Maresca. Në dhomën e VAR-it do të jenë Aleandro Di Paolo dhe Daniele Doveri. Kjo do të jetë ndeshja e tretë për Shqipërinë në këtë fushatë kualifikuese, pas humbjes ndaj Anglisë dhe fitores ndaj Andorrës. Ndërkohë, për Serbinë kjo do të jetë sfida e parë në grup. Cili është rezultati i pritshëm I ndeshjes së të shtunës?