Lezhë – Policia e Lezhës ka vënë në pranga autorin e plagosjes së ndodhur mëngjesin e sotëm në Balldre të Lezhës. Pas dy orësh kërkimesh, polica ka arritur të vërë në pranga Gjin Gjinin 69-vjeç. Sipas policisë, për motive pronësie Gjin Gjini ka plagosur në këmbë, me armë zjarri, shtetasin Hil Gjinin., i cili ndodhet në spital, nën kujdesin e mjekëve, jashtë rrezikut për jetën. Konflikti ka ndodhur në sy të fëmijës së Hil Gjinit i cili ka qenë në makinë me të atin. Plagosja është kryer me një pushkë, armë kjo që është sekuestruar nga policia. Njoftimi i policisë: Policia e Lezhës zbardhi dhe dokumentoi në kohë rekord ngjarjen e ndodhur mëngjesin e sotëm, ku mbeti i plagosur me armë zjarri shtetasi H. Gj. Kapet pas dy orë ndjekjeje nga shërbimet e Policisë së Lezhës, autori i dyshuar i plagosjes me armë zjarri të 43-vjeçarit. Shërbimet e Policisë gjetën dhe sekuestruan edhe armën e zjarrit tip “Pushkë”, me të cilën autori kreu plagosjen. Policia e Lezhës, menjëherë pas njoftimit të marrë për ngjarjen e ndodhur në fshatin Balldre, Lezhë, organizoi punën dhe falë reagimit në kohë dhe veprimeve të shpejta e profesionale bëri të mundur që pas dy orë ndjekjeje dhe kërkimesh, falë edhe mbështetjes së qytetarëve, të kapë në rrethinat e fshatit Balldre dhe të vërë në pranga shtetasin Gj. Gj., 69 vjeç, banues në Balldre. Ky shtetas dyshohet se për motive pronësie ka plagosur në këmbë, me armë zjarri, shtetasin H. Gj., i cili ndodhet në spital, nën kujdesin e mjekëve, jashtë rrezikut për jetën.