Një qytetare u ankua në Fiks Fare se, pasi bëri një vizitë te një okuliste te Poliklinika e Specialiteteve Nr.1, ‘Iraniani”, shkoi dhe bëri syze te një optikë që e rekomandoi ajo mjeke. Optika gaboi me recetën dhe i dha syze me numër më të madh. Qytetarja bën një tjetër vizitë te e njëjta optikë, kësaj herë me një mjeke tjetër, dhe rezulton se as receta e mjekes te Iraniani nuk ishte e saktë ... Denoncuesja shpjegon se i ishte drejtuar poliklinikës dhe kishte bërë një vizite me mjeken okuliste Joinida Dai. Okulistja e kishte vizituar dhe i shënon në recetë numrin, përkatësisht syri i djathti + 2.5 dhe syri i majtë + 2.75. Për syzet mjekja e drejton në një optikë përballë me poliklinikën, pasi bashkëpunonin bashkë. Denoncuesja bëri siç e orientoi okulistja por që me syzet nuk u ndje mirë. Për këtë ishte konsultuar sërish me mjeken Dai, por kjo e fundit i kishte thënë se do mësohesh. "Nga shqetësimet që kisha mendova se numri i syzeve nuk ishte i duhuri për mua" shprehet denoncuesja. Ajo shkon dhe i kontrollon xhamat e syzeve në disa optika të tjera ku të gjitha dalin në të njëjtin konkluzion. "Ato nxorën që syri i djathtë nga + 2.5 dioktri ishte bërë + 2.75. Kurse syri i majtë nga + 2.75 ishte bërë + 3. Dhe në të dy sytë ishin shtuar edhe lente cilindrike 0.25" shpjegon denoncuesja. Ajo pohon se në recetë nuk ka qenë e shkruar se kishte lente cilindrike. Sipas saj këtë e ka shtuar punonjësja e laboratorit tek optika që bëri syzet.