Urszula Gacek, do të udhëheqë grupin e vëzhguesve në zgjedhjet parlamentare të 25 Prillit. OSBE- ODIHR angazhohet për herë të 15-të në një proces zgjedhor në Shqipëri, ku incidentet parazgjedhore janë të pandashme. Këtë herë u shënuan më herët në Elbasan nga militantët e partive duke paralajmëruar një fushatë të nxehtë. Drejtuesja e misionit u tregua e kujdesshme për të mos dhënë një opinion paraprak, por foli për rreptësinë e monitorimit të ODIHR. Shitblerja e votës është një ndër fenomenet më problematike të konstatuara në raportet e përvitshme të misionit ndërkombëtar. Edhe këtë vit vëmendja e misionit do të jetë e madhe. Pandemia dhe ndryshimet ne ligjin zgjedhor janë dy risitë e këtyre zgjedhjeve duke marrë një vëmendje të posaçme. Drejtueses së misionit të ODIHR ju kërkua një mendim edhe për integritetin e kandidatëve, por zonja Gscek u tregua hermetike për këtë çështje. Misioni i vëzhguesve do të veprojë me një ekip prej 13 ekspertësh ndërkombëtar ndërkohë që do i bashkangjiten edhe 24 vëzhgues afatgjatë të cilët do të stacionohen në Shqipëri deri më 7 Maj. Ditën e zgjedhjeve është kërkuar një trupe prej 200 vëzhguesish, por për shkak të pandemisë numri këtë herë do të jetë më i reduktuar.