Kryeministri Edi Rama ka udhëtuar drejt Lezhës, ku është takuar me kandidatët për deputetë dhe ka zbuluar planin e PS për punimet që do të vijojnë në këtë qark nëse fitojnë zgjedhjet e 25 prillit. Në të përfshihet përfundimi i segmentit rrugor Milot-Fier, rruga Shëngjin-Velipojë, porti turistik i Lezhës, investimet në arsim dhe bujqësi për të ndihmuar më shumë fermerët. Rama: Ne kemi nisur një proces për atë segment të korridorit blu dhe kur ne e futëm këtë koncept në programin tonë, u përqeshëm dhe u akuzuam për ëndrra e mashtrime dhe segmenti Milot-Fier është prioritet i yni. E kemi nisur me një garë ndërkombëtare dhe nuk konkludoi me një kontratë, ishin të pafavorshme dhe do e rihapim garën pasi projekti dhe gjithçka tjetër janë gati dhe ky segment i korridorit blu Milot-Fier do të jetë vepra më e madhe publike në infrastrukturën rrugore e mandatit tonë të tretë. Është çështje ditësh edhe kantieri i rrugës së shumëpremtuar Shëngjin-Velipojë, pas lidhjes së kontratës me kompaninë fituese, me financimin e BERZH është gati. Nga ana tjetër jemi në proces për parkun e madh industrial që do të sjellë shumë mundësi të reja punësimi dhe për të cilin ka një interes në rritje që të vendosen në këtë park industrial pranë zonës ku gjendet aeroporti i Gjadrit, ashtu sikundër edhe parku tjetër i prodhimit të energjisë së erës, është tanimë një proces pasi është shprehur interes nga një kompani e madhe dhe janë duke u finalizuar të gjithë elementët dhe më pas të fillojë investimi. Në këtë zonë, jemi të vetëdijshëm për potencialin e madh të agroturizmit. Këtu kanë lindur dhe po zhvillohen disa prej perlave të agroturizmit në Shqipëri falë talentit të disa djemve e vajzave të kthyer nga emigracioni. Zhvillimi i mëtejshëm i të gjithë zonës turistike do të rrisë ekonominë, punësimin në këtë territor. Projekti tjetër për të cilin po punojmë është porti turistik i Lezhës që do të pasojë atë të Sarandës, të Vlorës dhe të Durrësit dhe ku kompania e madhe ka paraqitur dhe projektin e fazës së parë dhe do të fillojë edhe të dytin së shpejti. Porti i Lezhës është i katërti i këtij zinxhiri dhe e mbyll këtë zinxhir duke i ofruar të gjithë atyre që gjatë sezonit turistik, që bëjnë pjesë në turizimin e jahteve që të ankorohen në të gjithë bregdetin shqiptar. Ishte e vetmja zonë e pambuluar. Në fund, por jo për nga rëndësia, kemi bërë investime në Lezhë. Materniteti është drejt përfundimit, tek arsimi ku kemi bërë investime të rëndësishme dhe bujqësia ku ka ende punë për të bërë, i kemi ardhur në ndihmë të madhe jo vetëm fermerëve që kishin dekada që nuk punonin dot tokën për shkak të mungesës së ujit, por edhe komuniteteve që pavarësisht reshjeve të jashtëzakonshme të këtij fillimviti nuk janë prekur ose janë prekur pak nga përmbytjet.