Policia e Shtetit ka vënë në pranga një 32-vjeçar nga Durrësi për veprën penale Mashtrimi Kompjuterik. Denis Trungu, me precedentë të mëparshëm penalë, u arrestua si person i dyshuar, i cili nëpërmjet mashtrimit arriti të përfitonte 155 milionë lekë të vjetra nga një bankë e nivelit të dytë në vendin tonë. Duke shfrytëzuar situatën e pandemisë së Covid-19, për hapjen e llogarive për përfitimin e pagës së luftës, Trungu hapi një llogari të tijën bankare, nga ku shfrytëzoi një hapësirë dixhitale të kësaj banke për të kryer transaksionet. Ka qenë pikërisht banka, ajo e cila ka bërë kallëzimin në polici për humbjet që kishte konstatuar nëpërmjet këtij mashtrimi. I arrestuari, Denis Trungu, arriti që të përfitonte këtë shumë të madhe parash në një periudhë kohore prej 1 muaj e gjysmë, ndërsa hetimet e zhvilluara nga Krimi Kibernetik deshën gjashtë muaj, për të zbuluar aktivitetin kriminal. Trungu, arriti që gjatë kësaj periudhe të kryente 36 transaksione, në banka të tjera të nivelit të dytë. Më pas paratë e transferuara ai i tërhiqte nëpërmjet kartave bankare apo duke u paraqitur edhe vetë në bankë. Tentativa ka pasur që këto para ai t’i tërhiqte edhe nga banka të tjera jashtë vendit tonë. Denis Trungu ka edhe precedentë të mëparshëm penalë, pasi ai është dënuar me gjobë nga Gjykata e Durrësit, për veprën penale, të vetëgjyqësisë. Më pas ai do të binte në prangat e policisë, duke kryer një dënim 3 muaj, për Veprime në kundërshtim me vendimin e gjykatës. Por kjo nuk ishte hera e parë që ai kryente mashtrime. Trungu do të kryente edhe 9 muaj burg, pasi ishte pjesë e një grupi mashtruesish në Berat, të cilët kishin përfituar para. Sipas burimeve të policisë, 32-vjeçari ka deklaruar vetëm se ka kryer studimet në Universitetin e Aleksandër Moisiu në Durrës, dhe nuk ka deklaruar se me çfarë punë merrej, krahas mashtrimit. Ndërkaq, hetimet do të vijojnë më tej për të verifikuar deklarimet e tij, dhe për të zbardhur të gjithë aktivitetin kriminal.