Presidenti Ilir Meta, në ditën ndërkombëtare të medias, ka ngritur shqetësimin pasi sipas tij, liria e medias në vendin tonë fatkeqësisht është përkeqësuar ndjeshëm. “Shumë portale në të zezë e kanë ngritur “Fake News” në sistem, duke u vënë në shërbim të shtetit të propagandës. Ndërsa praktikat e “kasetave të gatshme” dhe të transmetimeve me “regji qendrore” po u imponohen gjithmonë e më shpesh televizioneve”, deklaroi Meta. Presidenti republikës merr përsipër të analizojë dhe të mbërrijë në përfundimin se cilat media në Shqipëri janë të besueshme, pa thënë se ku e bazon këtë konstatim. “Zëri i Amerikës” dhe “Deutche Welle” vijojnë të mbeten të vetmet burime informacioni të besueshme për shqiptarët edhe 30 vite pas rënies së komunizmit, për shkak se mediat shqiptare vijojnë të trysnohen e shantazhohen, në kurriz të raportimit të lajmit të vërtetë duke humbur besueshmërinë në sytë e opinionit publik”, shtoi ai. Pa media të lirë dhe të pavarur, thekson presidenti Ilir Meta,rruga e Shqipërisë drejt Bashkimit Evropian është e pamundur. “Apeloj me forcë heqjen dorë nga dhuna fizike e psikologjike, kërcënimi, shantazhimi dhe çdo lloj presioni, ngado që të vijë, ndaj gazetarëve. Shpreh solidaritetin tim të plotë me ta dhe i inkurajoj të vijojnë misionin e tyre me guxim, pa u trembur, në funksion të interesit publik e kombëtar, transparencës e llogaridhënies në çdo nivel shtetëror”, deklaroi presidenti. Presidenti Ilir Meta, thekson se fjala e lirë dhe liria e medias janë një kusht i pazëvendësueshëm për respektimin e të drejtave të njeriut në një shoqëri demokratike.