Që nga presidenti Meta e deri tek kryebashkiaku Veliaj kanë shprehur në rrjetet sociale dhimbjen për ikjen nga jeta të Koco Devoles. Presidenti i vendit Ilir Meta e konsideron një lajm tejet të trishtë humbjen e Devoles, ndërsa në një status në facebook shkruan: “Sikur të na thoje se bëre shaka, nga ato të kripurat, që ti na bëje gjithmonë! Humori dhe arti shqiptar padyshim humbën një prej kolosëve dhe figurave më të dashura, i cili do të na mungojë të gjithëve. Familjes Devole, të afërmve dhe gjithë artistëve ju shpreh ngushëllimet më të ndjera! Do të kujtojmë gjithmonë duke qeshur i dashur Koço! U prehsh në paqe!”, shkruan Meta krahas fotos së Devoles. Edhe kryeministri Edi Rama ka reaguar me një mesazh ngushëllimi pas ndarjes nga jeta të aktorit të madh të humurit, Koço Devole. Me një shënim në facebook, ku ka postuar një foto të aktorit, Rama ka zgjedhur shumë pak fjalë për t’i dhënë atij lamtumirën. “Lamtumirë i shtrenjti Koço! u prehsh në paqe” – shkruan kryeministri Rama. Kreu i PD-së, Lulzim Basha, ka reaguar me një mesazh ngushëllimi pa ndarjes nga jeta të aktorit të madh të humorit, Koço Devole. “Ngushëllimet e mia për familjen, të afërmit dhe miqtë e aktorit të madh të humorit shqiptar Koço Devole që humbi jetën tragjikisht në betejë me Covid19. U prehtë në paqe!”, shkruan Basha në Twitter.