Fiks Fare ndalet në fshatin Kolonjë të Lushnjës, ku 73-vjeçarja Violeta Osmani jeton e vetme në kushte shumë të vështira. Prej 12 vitesh ajo banon me qira në një shtëpi me lagështirë, ndërsa pensioni i saj mezi mjafton për të paguar qiranë dhe ushqimin. Me probleme të rënda shëndetësore dhe dhimbje të forta në sup, Violeta nuk arrin më të gatuajë apo të kujdeset për veten. Ushqehet kryesisht me bukë dhe djathë, ndërsa rrobat i lan me dorë pasi lavatriçja nuk funksionon. Pa ndihmë të vazhdueshme nga fëmijët që jetojnë në Itali, e moshuara kërkon vetëm një zgjidhje: dikush ta ndihmojë në përditshmëri ose ta sistemojnë në azil. Punonjësja sociale e Njësisë Administrative Kolonjë premton se do të nisin procedurat për strehimin e saj në shtëpinë e të moshuarve, nëse edhe vajza e Violetës jep dakordësinë.