Një histori tronditëse vjen nga Durrësi, ku një nënë denoncon se prej 9 muajsh nuk ka mundur të takojë djalin e saj 2-vjeçar. Sipas saj, fëmija mbahet nga ish-bashkëjetuesi, i cili ligjërisht nuk rezulton babai i tij. E përlotur, ajo rrëfen se është ndarë nga partneri për shkak të dhunës, fyerjeve dhe konsumit të alkoolit. Ndërsa ajo mban vajzën 1-vjeçare, djali i është marrë dhe nuk i lejohet ta takojë. Në përballjen me ish-bashkëjetuesin, ai refuzon ta dorëzojë fëmijën duke u justifikuar me një proces gjyqësor për njohjen e atësisë. Por deri në përfundim të këtij procesi, ai nuk ka status ligjor si prind. Shërbimi social pranon se fëmija duhet t’i kthehet nënës dhe paralajmëron pasoja ligjore, ndërsa policia, sipas denoncimit, refuzon të ndërhyjë dhe e përzë qytetaren me fjalë fyese.