Qindra të vrarë brenda pak ditësh, raketa që shkëmbehen rregullisht prej muajsh, panik e shpërngulje masive banorësh në zonat kufitare, e megjithatë, ende nuk flitet për luftë të hapur mes Izraelit dhe Hezbollahut. Por ajo që po ndodh në Libanin jugor është “një situatë lufte” për shefin e diplomacisë europiane, Josep Borrell. Vala e pandalshme e sulmeve ajrore izraelite, me në shënjester objektiva në këtë rajon dhe në Luginën Bekaa, të konsideruara bastione të grupit militant të mbështetur nga Irani, u përshkallëzua ndjeshëm së fundi, duke prekur sakaq edhe zona të tjera të vendit. Vetë forcat izraelite të mbrojtjes, IDF pohuan se kanë goditur 300 objektiva të Hezbollahut, që nuk resht edhe ai nga ana tjetër së bombarduari territorin izraelit. Raketat e tij nuk ndalen, edhe pse mbrojtja e fuqishme ajrore e Izraelit ka arritur të neutralizojë shumicën e tyre.