Lezhë – Dy persona janë vënë në prangat e policisë për shkak se akuzohen për trafikim të bombave me telekomandë drejt Malit të Zi. Të arrestuarit janë -Erol Çiçi., 33 vjeç dhe Mariglen Gruda., 30 vjeç, banues në Durrës (të dënuar me parë). Këta shtetas u kapën në flagrancë në vendin e quajtur “Rrethrrotullimi i Shëngjinit”, në hyrje të qytetit të Lezhës. Gjatë kontrollit të ushtruar nga Policia, në çantën e shtetasit Mariglen Gruda. janë gjetur dy bomba me mekanizëm shpërthimi në distancë nëpërmjet aparatit telefonik celular, ku njëra ishte me lëndë të dyshuar plasëse e llojit tritol dhe tjetra me lëndë të dyshuar si plasëse e llojit dinamit, të cilat dyshohet se do t’i trafikonin në drejtim të Malit të Zi. Njoftimi i policisë: Finalizohet me sukses operacioni policor i koduar “Distanca”. Operacioni i zhvilluar nga Sektori për Hetimin e Narkotikëve dhe Trafiqeve të Paligjshme, në bashkëpunim me shërbimet policore në DVP Lezhë, nën drejtimin e Prokurorisë së Rrethit Gjyqësor Lezhë. Goditet një tjetër tentativë e prodhimit dhe trafikimit të bombave me telekomandë për shpërthim në distancë.