Nxënësit e klasave të nënta i janë drejtuar këtë të hënë shkollave të mesme për regjistrim. Por ndryshe nga herët e shkuara, ata nuk kishin asnjë informacion nëse shtatorin do ta presin pranë mësimdhënësve apo ligjëratat do t’i ndjekin online. “Problem mësimin online nuk e shohin nxënësit. Por, ndryshe mendojnë prindërit e tyre të cilët thonë se bashkëbisedimi në mes nxënëseve dhe mësimdhënësve do ta bënte më të lehtë mësimi në veçanti për nxënësit e klasave të 10”. Drejtori i gjimnazit të shkencave natyrore “Xhevdet Doda” në Prishtinë, Azem Jaha tregon se varësisht nga situata pandemike janë tri variante që mund të aplikohen në shtator. Varianti i parë është kthimi i tërë nxënësve në klasa, varianti i dytë ndarja e nxënësve në dy grupe të cilët me rrotacion mund ta ndjekin një javë mësimin në klasa dhe një javë online, kurse varianti i fundit është që të gjithë të ndjekin mësimin vetëm online.