Beogradi po provokon sërish Prishtinën, duke zbarkuar forca ushtarake brenda vijës së kuqe të kufirit me Kosovën. Pavarësisht se efektivët e njësive të specializuara të ushtrisë serbe janë larguar tashmë më shumë nga vija ndarëse mes dy shteteve, ato janë parë disa metra larg kufirit të Kosovës. I pari që e ka ngritur alarmin ka qenë Kryeministri i Kosovës, Albin Kurti. Ai ka publikuar para 5 ditësh në Facebook, një video përmes së cilës pretenedonte se ushtarët serbë ndodhen në afërsi të fshatit Banje të Zubin Potokut. Kurti tha se Forcat e Armatosura të Serbisë po kryejnë stërvitje të rregullta në kufi me veriun e Kosovës, për të shkaktuar provokime. Më tej, kreu i qeverisë së Kosovës shtoi se efektivët e Kosovës po i vëzhgojnë ushtarët serbë nëse do përpiqen të kalojnë kufirin. Sipas Kurtit, këto lëvizje të ushtrisë serbe në afërsi të kufirit me Kosovën erdhën vetëm pak ditë pas kërcënimit të presidentit serb Aleksandar Vuçiç, se ndërkombëtaret duhet të zgjedhin mes Kosovës dhe Serbisë, ose kjo e fundit do presë momentin më të mirë të mundshëm dhe do ta shfrytëzojë mundësinë për të vepruar. Gazetar: Kristo Kote