Shqiptaro-Amerikania Blinera Kosovrasti denoncon në Fiks Fare se prona e saj në Dibër të Madhe është cenuar nga një ndërtim që, sipas saj, u krye pa leje mbi tarracën e përbashkët të godinës ku ka investuar rreth 500 mijë dollarë. Ajo tregon se bleu dy kate të një vile 3-katëshe për vajzat e saj që jetojnë në SHBA, por më pas personi që bleu katin e tretë nisi ndërtimin mbi tarracë. Sipas saj, komuna fillimisht pezulloi punimet duke konstatuar shkelje, por më vonë ndërtimi rifilloi dhe u përfundua. Gjatë investigimit, personi që kreu punimet pranoi se ndërtimi nisi pa leje, ndërsa institucionet lokale pretendojnë se dokumentacioni u plotësua më pas. Dokumentet e siguruara nga Fiks Fare hedhin dyshime mbi mënyrën si u trajtua ky rast nga komuna dhe institucionet përgjegjëse.