Martin Cani ishte vetëm 14 vjeç me ëndrrën e madhe për t'u bërë futbollisti i kombëtares, një ëndërr që iu këput në mes pas sherrit banal me bashkëmoshatarin e tij e që i mori jetën. Një sherr i nisur në rrjetet sociale e që kishte vijuar në shkollën "Fan Noli" me konfrontim fizik prej tri ditësh nuk u vu re nga askush, as shkolla, as komuniteti e as familjet, përveçse bashkëmoshatarëve të Martinit dhe autorit të ngjarjes Mario Përlleshi që ndiqnin çdo gjë në rrjetet sociale. Madje shokuese dhe pamjet e të miturit tjetër në Snapchat menjëherë pas ngjarjes së rëndë. Martini po dilte nga shkolla mesditën e të hënës, 18 nëntor, ku e kishte lënë të ballafaqohej sërish me bashkëmoshatarin e tij, në të njëjtën shkollë, Mario Përlleshi për fjalët banale që kishin shkëmbyer. Secili kishte thirrur shokët e tij dhe ngjarja përfundoi me goditjen me thikë të Martinit e shokut të tij Luisit, që fatmirësisht i mbijetoi sulmeve. Vogëlushi humbi jetën në spital për shkak të goditjes që kishte marrë në zemër.