Mirash Gjikolaj rikthehet me një rrëfim të fortë pas ngjarjes së rëndë, ku në automjetin e tij u vendos një sasi e madhe tritoli. Ai pretendon se, në vend që të zbardhet atentati ndaj tij, është shoqëruar, kërcënuar dhe madje goditur nga një oficer policie, vetëm pak orë pasi historia e tij u transmetua në Fiks Fare. Sipas Gjikolajt, gjatë shoqërimit drejt Prokurorisë së Sarandës, oficeri i ka marrë telefonin me forcë dhe e ka goditur me shpullë brenda furgonit të policisë. Ai thotë gjithashtu se në prokurori i është kërkuar llogari pse e denoncoi rastin publikisht, ndërsa shprehet se ndihet i pambrojtur dhe i lënë në mëshirë të fatit. Nga ana tjetër, prokurorja Valbona Maja i mohon akuzat për dhunë dhe shprehet se Gjikolaj është marrë vetëm për deklarime. Çështja mbetet nën hetim, ndërsa denoncimi i Mirash Gjikolajt ka ngritur pikëpyetje të forta mbi mënyrën si po trajtohet një viktimë që kërkon drejtësi.