Fiks Fare trajtoi mbrëmjen e së premtes rastin e znj.Flora Bello, e cila ankohet për kabujt që Drejtoria Rajonale OSHEE-së Elbasan, ka vendosur në murin e shtëpisë së saj pa miratim. Ajo shpreh për Fiksin se këto kabuj janë vendosur pa dijenin e saj dhe se prej një viti kjo gjë është kthyer në një problem të madh. Gjithashtu ajo tha se nëse do të ishte pyetur nuk do i kishte lejuar që këto kabuj elektrik të vendoseshin në banesën e saj, pasi e shqetëson fakti që ka rrezikshmëri të ketë ndonjë shkëndie elektrike. Përveç kësaj vendi ku këta kabuj janë vendosur është pjesë metalike dhe me shkëputjen e tyre mund të përcjellin korent në shtëpinë e saj. Qytetarja ka treguar se i është drejtuar Operatorit të Shpërndarjes së Energiisë Elektrike disa herë për shqetësimin e saj, hera e fundit ka qenë në fund të janarit, por që nuk ka marrë asnjëherë përgjigje. Menjëherë pas interesimit të Fiksit, grupi i punës një ditë më vonë ka shkuar pranë banesës së qytetares ku ka hequr kabujt nga banesa e saj.