Edhe pse mbart në vetvete shumë argëtim dhe çlodhje, stina e verës shoqërohet gjithashtu me probleme të shumta shëndetësore. Temperaturat e larta që e shoqërojnë këtë stinë shtojnë rastet e infeksioneve të traktit tretës dhe të zorrëve, si pasojë e ushqimeve të ndotura dhe për pasojë të helmuara. Këto infeksione nuk janë stinore, pra mund të ndodhin në çdo periudhë të vitit, por në këtë stinë të nxehtë njerëzit janë më shumë të ekspozuar ndaj ushqimeve të ndotura me baktere, viruse ose parazitë. Kjo, për faktin e thjeshtë qe mikroorganizmat që përmendëm shumohen shpejt në temperatura të larta, nga 32 deri në 43° C.