Kryeministrja e Italisë, Giorgia Meloni, është liderja e parë evropiane që uron Edi Ramën për fitoren në zgjedhjet parlamentare të 11 Majit. Shefja e qeverisë italiane publikon një foto krah Ramës dhe thekson se bashkëpunimi mes tyre do vijojë. “Dëshiroj t’i shpreh urimet e mia më të sinqerta Kryeministrit Edi Rama për rikonfirmimin e tij në krye të qeverisë shqiptare. Miqësia e thellë dhe bashkëpunimi strategjik që lidh dy kombet tona është forcuar më tej falë iniciativave të përbashkëta, fryt i një dialogu konstruktiv dhe i një vullneti të përbashkët për të përballuar sfidat globale me zgjidhje inovative. Do të vazhdojmë të punojmë për të konsoliduar më tej lidhjet mes dy qeverive tona dhe për të arritur objektivat e përbashkëta, përfshirë forcimin e stabilitetit në Ballkan dhe përparimin e rrugëtimit europian të Shqipërisë”. “Faleminderit motër”, iu përgjigj Rama homologes italiane, teksa e cilësoi privilegj bashkëpunimin me të. "Faleminderit, motër. Është nder të shërbej për një marrëdhënie të jashtëzakonshme afërsie dhe miqësie si ajo mes Shqipërisë dhe Italisë, dhe është privilegj të bashkëpunoj me një lidere si ti, që thua atë që bën dhe bën atë që thua. Më e mira për dy vendet tona ende nuk ka ardhur”.