Një punonjëse e Bashkisë së Cërrikut denoncon në Fiks Fare se po pengohet të ushtrojë detyrën, edhe pse është rikthyer në punë me vendim gjykate. Mimoza Llaha thotë se pas shkarkimit në vitin 2024 fitoi betejën ligjore dhe u emërua sërish në detyrë, por prej muajsh nuk lejohet të futet në godinën e bashkisë. Sipas saj, policia bashkiake i bllokon hyrjen me “urdhër nga lart”, ndërsa drejtuesit e institucionit shmangin përgjegjësinë. Ajo akuzon kryetarin aktual të Bashkisë së Cërrikut, Florenc Doka, për hakmarrje personale, pasi më herët kishte bërë ankesë ndaj tij në Komisionerin e Shërbimit Civil. Pamjet e transmetuara nga Fiks Fare tregojnë debatet me policët e sigurisë dhe përplasjet brenda ambienteve të bashkisë, ku punonjësja kërkon të ushtrojë të drejtën e saj për të punuar.