Prej dy ditësh fshati Murqin, në njësinë Administrative Bubq, Fushë Krujë, ndodhet nën pushtetin e ujit. Siç mund të shihet janë dhjetra hektarë tokë të përmbytura. Në lagjen që shihni pas meje, banorët nuk munden të lëvizi për shkak se uji ka arritur oborret e tyre. Kjo është hera e tretë brenda muajit janar që ky fshat përmbytet. Kjo është rruga e njërës prej lagjeve të këtij fshati, e cila në çdo reshje shiu, përmbytet dhe bëhet e pakalueshme. E vetmja formë për të kaluar është që të përdoren automjete të larta. Nikoll Paluka, tregon për Top Channel vështirësitë që ai has kur ka përmbytje në zonë. “Dal me zator nga shtëpia…uji ka ardhur deri afër oborreve të shtëpisë”, tha Paluka. Një tjetër banor i fshatit Murqin, thotë se krahas dëmtimeve që kanë pasur në kulturat bujqësore, rruga mbetet shqetësuese, pasi pjesën më të madhe të banorëve i ka izoluar. Kjo shtëpi që shihni në pamje, është braktisur nga pronarët e saj rreth tre vite më parë, për shkak të përmbytjeve. Niveli i ujit arrin deri në dritaret e shtëpisë. Tashmë ata, sipas informacioneve të banorëve të zonës, jetojnë me qera, në një tjetër lagje të fshatit. Ndërkaq, dëmet në toka janë të konsiderueshme dhe banorët ende kanë frikën e reshjeve të shiut në ditët në vijim.