Politika majtas dhe djathtas i ka përdorur votat unanime të vitit 2016 për votimin e reformës në drejtësi si një pretekst për ta cilësuar jo në pak raste drejtësinë si një produkt dhe vullnet i njërës apo tjetrës palë. Por përkundër asaj që palët pretendojnë, drejtësia prej kohësh rrëzon pritshmëri dhe strategji politike me vendimet e saj, duke imponuar në axhendën e politikës frikë, reaksion dhe vendime të forta. Në kohën kur ish-kryeministri Berisha gjendet nën masën e arrestit të shtëpisë, kryebashkiaku Veliaj u thirr në SPAK dhe me hetime që po shkojnë drejtë fundit për ish-Presidentin Meta, politika jep sinjalin se pushteti i drejtësisë mund të lëkundet. Grupi i punës i përbërë nga deputetë të mazhorancës dhe opozitës janë gati të ulen sërish përballë tyre për rishikimin e Reformës në Drejtësi, me një paketë propozimesh që palët e kanë gati dhe që prekin ligjet që organizojnë sistemin e drejtësisë. Ishte Klotilda Busha, kryetarja e Komisionit të Ligjeve që paralajmëroi nisjen nga puna për këtë paketë ndryshimesh javën e ardhshme. Projekt-amendamentet finale të deputetëve propozojnë ndërhyrje në ligjin e statusit të gjyqtarëve dhe prokurorëve, ligjin për Qeverisjen, ligjin për Pushtetin Gjyqësor, ligjin për SPAK dhe ligjin për Prokurorinë. Rezervat dhe përplasjet e palëve për drejtësinë u shfaqën edhe sot në Parlament.