Fiks Fare denoncoi mbrëmjen e së enjtes sorollatjet dhe veprimet burokratike të punonjësve të Bashkisë së Durrësit, të cilën harruan plot 5 vite në sirtar një dosje të një qytetari, të cilit i ishte prishur shtëpia nga tërmeti i 2019-ës. Luman Rexhollari, banues në lagjen nr.18 në Durrës, u ankua në redaksinë e emisionit investigativ se nusja e djalit të tij, Matilda Novaku, ka aplikuar për fondet e rindërtimit, pasi banesa e Lumanit doli me dëmtime DS3. Lumani, i cili tashmë jeton vetëm pasi bashkëshortja është ndarë nga jeta, është interesuar me dhjetëra herë në Bashkinë e Durrësit, por ka marrë përgjigje se "s'ka fonde". Fiksi interesohet te zyra e rindërtimit në Bashkinë Durrës. Specialisti i rindërtimit thotë se aplikimi i familjes është bërë në dhjetor të vitit 2020. Ai shikon emrin dhe thotë se ka aplikim, por s’është në listë. Fiks Fare i drejtoi disa pyetje Bashkisë së Durrësit, e cila thotë se kërkesa e qytetarit Luman Rexhollari ka kaluar fazën e vlerësimit dhe shqyrtimit paraprak të dokumentacionit dhe është ne pritje të një vlerësimi përfundimtar. Në përgjigje, bashkia thotë se me shumë mundësi Këshilli Bashkiak do të marrë një vendim për këtë familje pas plot 5 vitesh.