Fiks Fare denoncon situatën e rëndë në “Unazën e Madhe të Burrelit”, një segment rrugor që kushtoi rreth 1.3 milionë euro, por që është dëmtuar në 5 pika të ndryshme pa u inauguruar ende. Banorët e zonës tregojnë se rruga është bërë pothuajse e pakalueshme, me shembje të mëdha, rrëshqitje të dherave dhe deformime të trupit të rrugës. Në disa segmente, rruga është fundosur ose është zënë nga inerte, duke e bërë të vështirë qarkullimin. Ndërkohë, Autoriteti Rrugor Shqiptar ka hapur një tjetër procedurë me vlerë rreth 950 mijë euro për “masa inxhinierike” dhe riparim të dëmtimeve, në vend që të mbahen përgjegjës projektuesit, ndërtuesit apo mbikëqyrësit e punimeve. Firma ndërtuese “Ulza” shpk pretendon se ka zbatuar projektin dhe se shembjet janë shkaktuar nga shirat e dendur dhe terreni i vështirë, duke e cilësuar situatën si “faji i natyrës”.