I dehur me suksesin e përfundimit të luftës në Gaza, Donald Trump po e kthen vëmendjen e tij te pushtimi i Ukrainës nga Rusia. Por sjellja e paqes në Evropë nuk do të jetë më pak sfiduese dhe do të kërkojë një lloj tjetër diplomacie. Ndalimi i luftës në Ukrainë, në thelb do të thotë bindja e Vladimir Putinit të ndalë luftimet. Ukraina ka kohë që e ka pranuar në parim idenë e një armëpushimi që ngrin vijën aktuale të frontit. Trump i ka ofruar Putinit shumë mundësi për paqen por tani duket se e ka humbur durimin. Dhe në këtë kuadër raketat Tomahaëk, të kërkuara nga Ukraina, duken si një mjet shtrëngues. Tomahaëk është një raketë 5.5 metra e gjatë, që fluturon ulët e zakonisht përdoret nga nëndetëset dhe kryqëzorët e SHBA-së dhe Marinës Mbretërore britanike për të goditur objektiva tokësore. Është një armë e frikshme dhe precizioni i saj, madhësia e kokës së saj luftarake dhe mbi të gjitha rrezja e saj prej 2,500 km, do ta shtonin ndjeshëm rrezikun për ushtrinë ruse. Ajo do t'i lejonte Ukrainës të godiste shënjestrat e rëndësishme dhe vendet e lëshimit të raketave kruiz dhe dronëve që terrorizojnë çdo natë Kievin, të shkaktonte kaos në komandën dhe kontrollin rus dhe të ndëshkonte sektorin e rafinimit të naftës në Kremlin, i cili po lëkundet.