Kompania franceze “Voltalia” është shpallur fituese e ankandit ndërkombëtar që do të ndërtojë parkun fotovoltaik të Spitallës. Çmimi i ofruar nga “Voltalia” është 29.89 euro për mW/h, shumë poshtë tavanit të vendosur nga dikasteri i Energjisë prej 55 euro, ndërsa në garën për këtë vepër energjetike morën pjesë 5 kompani ndërkombëtare. Francezët e “Voltalia” do të ndërtojë edhe impiantin diellor të Karavastasë, një nga projektet më të mëdha në rajon, një investim me vlerë 100 milionë euro. “Themi se do stabilizojë sektorin energjetik në Shqipëri duke zbutur luhatshmërinë që krijojnë kushtet klimaterike. Është një sistem shumë i mirë dhe për konkurrueshmërinë e Shqipërisë. Është një hap i madh që Shqipëria të bëhet një eksportues i energjisë së pastër në rajon.” Sinkron Matteo Colangeli, BERZH. Parku diellor i Spitallës do të ketë një kapacitet prodhues prej 100 megavatësh, ku 70 prej tyre do të blihen nga OSHEE dhe pjesa tjetër do të hidhet në treg të lirë nga prodhuesi. Nisur nga interesi i lartë i investitorëve pritet që Ministria e Energjisë do të nisë së shpejti edhe një formë të re ankandi, ato hibride që do bazohen në energjinë e rinovueshme diellore dhe energjinë e prodhuar nga parqet eolike, si një mënyrë për të diversifkuar burimet e energjisë në vend.