Policia ka vijuar në mënyrë intensive hetimet për vrasjen e bujshme mafioze e Behar Sofisë në qendër të Tiranës mëngjesin e së enjtes. grupi hetimor që po punon për zbardhjen e krimit ka marrë në pyetje pasditen e së enjtes familjarët e 66 vjeçarit të cilët kanë mohuar që të kenë pasur konflikte apo kërcënime kohët e fundit. Familjarët i kanë pohuar policisë se Behari kishte dalë të pinte kafe e më pas do të bënte pazaret e ditës dhe do të kthehej në banesë. Sipas tyre, kur doli, 66 vjeçari nuk u tha nëse kishte lënë të takohej me njeri. Ndërkaq nga këqyrja paraprake që i është bërë celularit të viktimës, nuk janë gjetur biseda me persona të dyshimtë, përveç familjarëve. Deri tani janë të shoqëruar për t’u marrë në pyetje të paktën 10 persona, të gjithë familjarë dhe të afërm të viktimës dhe asnjë person i dyshuar. Behar Sofia, një emër mjaft i njohur për policinë dhe drejtësinë, u ekzekutua në një atentat mafioz mëngjesin e së enjtes, vetëm pak metra larg shtëpisë në mes të Tiranës, në zonën pranë Piramidës. 66-vjeçari jetonte pranë një qendre tregtare në buzë të lumit Lana, në një zonë shumë të populluar në kryeqytet dhe ka dalë prej banesës pak minuta para se ta qëllonin me silenciator. Hetimet kanë zbardhur gjithashtu edhe disa të dhëna që lidhen me autorin e krimit, nga analizimi i pamjeve të kamerave të sigurisë rezulton se atentatori e ka pritur tek dera e pallatit disa ditë. Ndërsa mëngjesin e së enjtes e gjurmoi nga dera e pallatit deri përballë Piramidës ku dhe e qëlloi me një plumb në qafë e tjetrin në shpatullm me një armë me silenciator. në vendin e ngjarjes u gjetën edhe dy gëshojat e plumbave . Nga pamjet e kamerave, rezulton se autori është meso-burrë i veshur me kostum sportiv të errët dhe fytyrën e ka pasur të mbuluar, ndërkohë që ka dyshime se bëhet fjalë për një vrasës me pagesë. Behar Seferi, alias Behar Sulo Sofia, ndërsa rezulton që të jetë i dënuar jashtë vendit për trafikim të lëndëve narkotike. Po ashtu ai kishte pasur disa biznese pranë stadiumit Dinamo, të cilat në disa raste janë sulmuar me tritol, ndërkohë që posedonte edhe disa markete dhe kopshte.