Një histori e rëndë vjen nga Vlora, ku një 50-vjeçare jeton prej vitesh me pasoja të rënda shëndetësore pas një operacioni të kryer rreth 10 vite më parë për heqjen e gurëve në tëmth. Sot, gjendja e saj është përkeqësuar, ndërsa familjarët thonë se ajo vuan çdo ditë nga dhimbje të forta dhe një plagë e hapur që nuk shërohet. Sipas familjes, komplikacionet nisën pas ndërhyrjes kirurgjikale dhe me kalimin e viteve situata vetëm është rënduar. Ata pretendojnë se pacientja nuk ka marrë trajtimin e duhur mjekësor dhe se disa mjekë kanë refuzuar ndërhyrje të re për shkak të gjendjes së saj shëndetësore. Pas denoncimit, rasti u referua në Spitalin Rajonal të Vlorës, ku pacientja u transportua me ambulancë për ekzaminime të mëtejshme dhe vlerësim mjekësor. Familjarët shpresojnë që këtë herë të gjendet një zgjidhje për gjendjen e saj të rëndë.