Një zë i njohur në telefon, një video që duket reale, por në të vërtetë është një mashtrim i ndërtuar me inteligjencë artificiale. Këto janë armët e reja të krimit në Shqipëri, që po i japin dimensione të reja mashtrimit, shantazhit dhe manipulimit të informacionit. Grupe të organizuara kriminale në Shqipëri dhe rajon kanë filluar të investojnë në teknologji AI për mashtrime financiare, zhvatje dhe komunikim të koduar që është i vështirë për t’u ndjekur nga autoritetet. Platforma të koduara si Telegram, Signal apo edhe forume në Dark Web po përdoren për të tregtuar aplikacione që krijojnë deepfake për zë dhe video. Çmimet variojnë nga 50 deri në 500 euro për një video të personalizuar me IA. Një ngjarje e tillë ndodhi me sekretarin amerikan të shtetit Mark Rubio ku tre ministra janë kontaktuar përmes SIGNAL nga një zë si ai i Rubios. Në fillim të korrikut 2025, ka nisur qarkullimi në Facebook i një videoje të manipuluar me teknologji AI që shfaqte fytyrën dhe zërin e Dr. Skënder Bratajt. Kreu i Urgjencës reagoi publikisht teksa një qytetar nga Lezha kishte shkuar tek ai në urgjencë për një “krem mrekullie” që u ishte thënë në atë video. Ekspertët e sigurisë kërkojnë ndryshime urgjente në Kod Penal dhe ngritjen e një njësie speciale për IA në strukturat e rendit dhe drejtësisë. Sa të pambrojtur jemi nga ky lloj mashtrimi? A mund të trajtohet klonimi i zërit si formë e re e “vjedhjes së identitetit”? Kush mban përgjegjësi kur dëmtohet qytetari?