22 tetori njihet si dita kombëtare e aktivizmit dhe me këtë rast zhvillohen një sërë aktivitetesh të cilat synojnë që të nxisin individët dhe shoqatat në shërbim të komunitetit. Kjo ditë njihet ndryshe si dita dedikuar njerëzve dhe nismave që guxojnë për të përmirësuar problematikat shqetësuese të shoqërisë, pavarësisht, gjeografisë, racës, etnisë apo gjinisë. Grupime të ndryshme do të marshojnë sot për kauza të caktuara si: të drejtat e njeriut, fuqizimi i gruas, mbrojtja e mjedisit...etj. Në këto marshime do të marrin pjesë të gjitha moshat duke e bërë këtë ditë sa më gjithëpërfshirëse. Përtej kësaj, do të jetë edhe panairi i aktivizmit në sheshin "Skënderbej", ku organizatat do të sjellin aktivitete konkrete të prekshme për të gjithë. Fokusi i këtij viti është angazhimi i sa më shumë të rinjve dhe për këtë arsye organizatat mund të ndërveprojnë me grupe rinore apo shkolla të ndryshme.