Data 14 qershor 2018 ka shënjuar përjetësisht fatin e familjes Karaifili nga Korça. Djali i tyre, Antonio, vetëm 18 vjeç u gjet i varur në një pemë në pyllin e Voskopojës. Një ngjarje që tronditi gjithë qytetin, por nuk bindi familjarët që kishin hije të forta dyshimi për mënyrën dhe arsyet që cuan djalin të ndërmerrte një akt ekstrem. Kontakti i fundit që e kishte takuar Antonion ishte e dashura e tij, Kejsi Spahillari, asokohe 17 vjeçe. Ajo kishte lajmëruar familjen e të dashurit se ai ishte larguar dhe nuk përgjigjej dhe për këtë arsye kishin shkuar ta kërkonin, derisa e kishin gjetur të varur në një pemë. Skena thriller u përpoq të fshihej dhe nga Prokuroria e Korcës që kërkoi 3 herë pushimin e çështjes duke e klasifikuar si vetëvrasje dhe jo vrasje, ndërsa Gjykata urdhëronte rikthimin e hetimeve. Pas 7 vitesh lufte, familja e Antonios ia doli të vendoste drejtësinë duke u dhënë prova të pakundërshtueshme hetuesve. Prokuroria e Korçës ka ngritur akuzën e vrasjes me dashje për Kejsi Spahillarin, ish të dashurën e Antonios dhe Rexhep Vathit, 65-vjeçar, i cili kishte një marrëdhënie të afërt me vajzën. Ata të dy në bashkëpunim kanë vrarë me çarçaf Antonion dhe më pas e kanë lidhur në pemë, duke e bërë sikur kishte vrarë veten. Ndaj Kejsi Spahillarit është lëshuar urdhër arresti, pasi ajo ka emigruar drejt Kanadasë, ndërsa Rexhep Vathi është vetëvrarë me fotoksinë në gushtin e 2024.