Me daljen e ekonomisë nga karantina duket se është përmirësuar edhe besimi i bizneseve dhe konsumatorëve në ekonomi. Sipas vrojtimit të Bankës së Shqipërisë, në tremujorin e tretë Treguesi i Ndjesisë Ekonomike rrit me 23 pikë duke arritur në 75.3, pasi preku në tremujorin e dytë nivelin më të ulët historik. Rritja e këtij treguesi u ndikua kryesisht nga përmirësimi i bizneseve veçanërisht në sektorët e shërbimeve dhe ndërtimit dhe më pak nga ai i konsumatorëve. Me gjithë përmirësimin e shënuar në tremujorin e tretë, sërish Treguesi i Ndjesisë Ekonomike është nën mesataren historike edhe për shumicën e treguesve të aktivitetit. Treguesi i besimit në sektorin e ndërtimit shënoi një rritje me 23.2 pikë përqindje dhe bizneset që operojnë në këtë degë të ekonomisë shprehen optimiste për ecurinë e çmimit të banesave.