Pas firmosjes së urdhrit ekzekutiv të Donald Trump për ndërprerje të financimeve të programeve të ndryshme në botë nga Shtetet e Bashkuara të Amerikës, ambasada e SHBA në Tiranë ka njoftuar të gjitha institucionet shqiptare për pezullimin e fondeve. Letra i është dërguar fillimisht Ministrisë për Europën dhe Punët e Jashtme për të informuar Qeverinë mbi synimin e Urdhrit Ekzekutiv të Qeverisë së SHBA-së për të pezulluar zbatimin, detyrimet e reja dhe disbursimet e fondeve deri në përfundimin e një rishikimi të të gjitha programeve të ndihmës së huaj. Bëhet fjalë për një sërë institucionesh që janë partnere dhe zbatuese të programeve të ndihmës së financuar nga SHBA në Shqipëri, që nga policia e shtetit deri tek qeverisja vendore. Ajo që bie në sy është edhe ndërprerja e fondeve për organet e drejtësisë, përfshi SPAK dhe GJKKO, Gjykatën Kushtetuese e të Lartë, etj. Këto programe prekin një sërë fushash në Shqipëri që nga arsimi, qeverisja vendore, procesi i integrimit e deri tek drejtësia. Si ndikon urdhri ekzekutiv i Trump në institucionet shqiptare?