Deklaratat e Sali Berishës mbi serverat e Kryeministrisë në ngjarjen e 21 Janarit 2011 rezultojnë kontradiktore. Në deklaratat e tij më të fundit, Berisha pohon se Kryeministria nuk ka pasur server, duke ia atribuar përgjegjësinë Gardës së Republikës. Por më 23 janar 2011, në një mbledhje të qeverisë, vetë Berisha deklaronte publikisht se Kryeministria kishte sistemin e saj të kamerave dhe se kishte urdhëruar Sekretarin e Përgjithshëm të vendoste në dispozicion të Prokurorisë të gjithë materialin filmik, duke e cilësuar atë të plotë dhe të paprekur. Në konferencën e djeshme për shtyp, në 15-vjetorin e 21 Janarit, Berisha nuk shprehu asnjë pendesë për vrasjet, duke e quajtur protestën një organizim të Edi Ramës dhe Filip Çakullit, si dhe duke akuzuar për manipulim të videos së famshme Meta–Prifti.