Afrimi i Shqipërisë me Bashkimin Europian merr një tjetër shtyrje. Ambasadorët e BE-së thonë se Shqipëria ka shënuar përparim në përmbushjen e kushteve, por ka ende punë për të bërë. Fillimi i bisedimeve shtyhet edhe për Maqedoninë e Veriut për shkak të mosmarrëveshjeve me Bullgarinë për gjuhën dhe minoritetin maqedonas. Mosmarrëveshjet mes ambasadorëve të BE-së për hapjen e bisedimeve me Shqipërinë dhe Maqedoninë e Veriut bënë që ato të mos nisin në dhjetor. Komiteti i Përhershëm Përfaqësuesve, i njohur si Coreper, ra dakord në draftin e konkluzioneve se Shqipëria nuk është gati për konferencën e parë ndërqeveritare me BE-në, pasi ka ende punë për të bërë në përmbushjen e kushteve të vendosura më herët në mars. Ambasadorët përshëndetën punën e bërë nga Shqipëria për reformat, por theksuan se duhet të tregojë më shumë përparim në përmbushjen e kushteve. Italia u mundua që të zbuste gjuhën e përdorur në tekstin e konkluzioneve për Shqipërinë, por kjo kërkesë u refuzua. Përsa i përket Maqedonisë së Veriut, dokumenti thekson se data për konferencën e parë ndërqeveritare do të vendoset pas zgjidhjes së mosmarrëveshjeve me Bullgarinë. Kjo e fundit ka bllokuar bisedimet pasi pretendon se maqedonishtja është dialekt bullgar dhe se nuk ka minoritet maqedonas në Bullgari. Dy çështjet duhet të përfshihen në dokumentin final për nisjen e bisedimeve, por kryeministri Zoran Zaev deri më tani ka refuzuar t’i pranojë ato. Drafti i konkluzioneve nga ambasadorët do të kalojë te ministrat e jashtëm dhe të çështjeve të Europës të Unionit më 8 dhjetor. Fillimi i bisedimeve me Shqipërinë dhe Maqedoninë e Veriut tashmë mund të miratohet në mars 2021, por as kjo nuk është e sigurtë.