Lista e ligjeve dhe e koncesioneve që Lulzim Basha është zotuar se do i anulojë pas 25 Prillit është e gjatë, por së fundmi është shtuar edhe sistemi i fiskalizimit, të cilin demokratët e konsiderojnë aferë korruptive, e cila duhet hetuar. Lulzim Basha: Në fakt plani ynë është i qartë dhe i thjeshtë. Fiskalizimi do të anulohet! 600 deri në 2000 euro që duhet të paguajë biznesi i vogël, pasi i jepet fatura e energjisë dyfish krahasuar me dy vite më parë, pasi është rritur çmimi i naftës, pasi me çdo gjobë i merret fitimi i muajit, nganjëherë dhe i vitit. Kjo aferë do të hetohet deri në fund, ashtu siç kemi thënë prej ditës së parë, ashtu siç kemi denoncuar me fakte sepse për biznesin e vogël dhe të mesëm, që për ne fillon nga 140 milionë lekë të vjetra, do ketë një dhe vetëm një masë. 0.5% tavani i xhiros vjetore për taksat dhe tarifat vendore, një pullë fiskale në hyrje të biznesit, që do të ndalojë praninë e tatimorëve, janë dy garancitë që do të çlirojnë biznesin e vogël dhe të mesëm që është kolona vertebrale e ekonomisë. Kryedemokrati garanton se nuk do e prekë reformën në drejtësi, ndryshe nga sa e akuzon kundërshtari politik. Lulzim Basha nënshkroi publikisht një marrëveshje me përfaqësuesit e personave me aftësi të kufizuar, ku u zotua me shkrim se brenda 6 muajve të parë të qeverisjes së djathtë do të ndërhyhet dhe përmirësohet legjislacioni penal, administrativ, civil dhe ai noterisë; për të garantuar akses të barabartë për këtë kategori në cdo fushe. Për çdo individi me aftësi të kufizuar të prekur nga Covid- 19, premtohet mbështetje financiare përmes rimburisimit. Lulzim Basha: Marrëveshja na detyron që nga dita e parë e qeverisjes jo vetëm të korrigjojmë gabimet e rënda, do thoja fajet e rënda që kanë rënduar mbi kurrizin e dhjetëra mijëra personave me aftësi të kufizuara këto tetë vite, por mbi të gjitha na angazhon që standardin europian, cilësinë europiane të trajtimit të personave me aftësi të kufizuara ta kemi si synimin, objektivin dhe shënjestrën e çdo mase që do të marrim këtej e tutje si një qeveri e përgjegjshme. Me herët Basha u takua me të rinjtë e Farkës, të cilëve iu përsëriti angazhimin se Partia Demokratike do anulojë ligjin e arsimit te lartë.