"Kam një libër "Kuzhina shqiptare" dhe unë jam shumë i dhënë pas eksperimenteve në kuzhinë. Kam bërë për herë të parë petulla si ato që bënim një herë e dikur që i hanim me sheqer". Ditët e karantinës i kanë shërbyer balerinit shqiptar Ilir Shaqiri për t'ju rikthyer pasionit të dikurshëm; kuzhinës. Iliri na tregoi se këto ditë në shtëpinë e tij gatuhen vetëm receta shqiptare. "Dje bëra mashkurka me mish. Kemi dhe një komshije këtu italiane që quhet Daniela me të cilën këmbejmë vaktet. Unë gatuaj receta shqiptare, ndërsa ajo receta italiane. Unë gatimin se kam problem se kam ardhur i vogël në Itali dhe më duhej të gatuaja për veten asokohe. Kështu avash -avash ndër vite është krijuar dhe ai Ilir kuzhinieri, që mund të bëj edhe master shefin në kuzhinë. Karantina madje më ka mësuar të jem edhe pak berber"- thotë balerini me të qeshur.