Një familje në ndihmë ekonomike në Kombinat është përballur me një faturë të energjisë elektrike prej rreth 90 mijë lekësh për një muaj, shumë e papërballueshme për gjendjen e saj ekonomike. Sipas familjes, problemi ka ardhur pasi sahati i energjisë nuk është lexuar rregullisht për një periudhë të gjatë, rreth një viti, duke sjellë akumulim dhe llogaritje të pasakta të konsumit. Leximi i matësit ka munguar për muaj të tërë, ndërsa në banesë familja thotë se përdor vetëm pajisje bazike si sobë dhe frigorifer. Pas ankesës së bërë dhe ndërhyrjes së emisionit investigativ, OSHE sqaroi se problemi ka ardhur nga mungesa e leximit të rregullt dhe se matësit janë mbuluar përkohësisht nga staf tjetër, duke sjellë pasaktësi në faturim. Institucioni bëri me dije se rasti është zgjidhur dhe familjes i është ofruar pagesë me këste, për ta lehtësuar barrën financiare.