Një familje në Rubik ankohet se, edhe 6 vite pas tërmetit, nuk është trajtuar as me banesë dhe as me kompensim financiar. Shkak është bërë ligji, pasi paratë kanë ardhur dhe nuk shpërndahen për shkak se nuk e lejon ligji! Grupi i Fiks Fare udhëtoi në Rubik, një qytezë në varësi të Bashkisë së Mirditës, me kërkesë të z. Preng Doda. Ai thotë se shtëpia e tij u shkatërrua plotësisht nga tërmeti i vitit 2019. Ka aplikuar për banesë të re dhe është miratuar edhe një Vendim i Këshillit Bashkiak të Mirditës, ku familja e tij me 3 kurora është shpallur fituese e procesit të rindërtimit, të një banese të re. Por këtu fillon edhe kalvari i familjes Doda, pasi në qytezën e Rubikut familja ka pasur në pronësi vetëm truallin ku ka qenë banesa. Bashkia Mirditë shprehet se lekët janë por ligji i pengon që t'ua japin , pasi u quhet shkelje. E vetmja zgjidhje sipas bashkisë është ndryshimi i VKM-së për përfituesit.