Prej muajsh, rreth 300 pacientë në Spitalin Rajonal të Durrësit presin të kryejnë operacionet e kataraktës për shkak të mungesës së lenteve okulistike. Mes tyre është edhe pensionisti Shani Dafku, i cili tregon se ka kryer të gjitha analizat dhe vizitat që në fund të vitit 2025, por ende nuk ka mundur të operohet. Fiks Fare investigoi situatën dhe bisedoi me stafin e shërbimit të okulistikës, ku u konfirmua se mungesa e lenteve ka bllokuar operacionet prej muajsh. Shefi i shërbimit pranoi se ende nuk ishte hapur tenderi për furnizimin e tyre, ndërsa qindra pacientë vazhdonin të prisnin. Pas interesimit të Fiks Fare, Spitali Rajonal i Durrësit bëri me dije se është furnizuar me lente dhe ka nisur planifikimin e operacioneve. Megjithatë, institucioni nuk dha përgjigje për numrin e saktë të pacientëve në pritje, operacionet e shtyra dhe përgjegjësit për situatën e krijuar.