Banorët e fshatit Guri i Bardhë në Bulqizë denoncojnë gjendjen e ujësjellësit të ri, për të cilin janë investuar 219 milionë lekë. Edhe pse projekti ka përfunduar më pak se 2 vite më parë, ata thonë se vepra është amortizuar. Nga verifikimi në terren, konstatohet se kaptazhi paraqet dëmtime, ndërsa një pjesë e strukturës është e mbuluar me materiale të papërshtatshme dhe rrethimi është i dëmtuar. Banorët shprehen të shqetësuar për sigurinë dhe cilësinë e ujit që përdorin çdo ditë. Nga ana tjetër, Ujësjellës-Kanalizime Bulqizë deklaron se dëmtimet janë të vogla dhe janë shkaktuar nga kushtet atmosferike. Sipas tyre, objekti është ende në garanci dhe ndërhyrjet do të kryhen nga firma ndërtuese, pa kosto shtesë.